Қолданбалардың осалдықтарын анықтау және түзету туралы
Kaspersky Security Center Linux қолданбасы Microsoft Windows операциялық жүйелерінің басқаруымен жұмыс істейтін басқарылатын құрылғылардағы қолданбаларда осалдықтарды анықтайды және түзетеді. Осалдықтар операциялық жүйелерде және Microsoft қолданбалық жасақтамасын қоса, үшінші тарап қолданбаларында кездеседі.
Қолданбалардың осалдықтарын анықтау
Осалдықтарды анықтау үшін Kaspersky Security Center Linux қолданбасы белгілі осалдықтар туралы дерекқордағы белгілерге негізделген қолданбаның белгілі осалдықтарын іздейді. Дерекқорды "Лаборатория Касперского" мамандары жасап, өзекті күйде ұстайды. Онда осалдықтардың сипаттамасы, осалдықтарды анықтау күні және осалдықтардың қауіптілік деңгейі сияқты осалдықтар туралы ақпарат бар. Қолданбаның осалдықтары туралы ақпаратты "Лаборатория Касперского" сайтында алуға болады.
Kaspersky Security Center Linux жүйесінде қолданбалардағы осалдықтарды іздеу үшін Осалдықтарды және қажетті жаңартуларды іздеу тапсырмасы пайдаланылады.
Қолданбаларда осалдықты түзету
Қолданбаларда осалдықтарды түзету үшін, Kaspersky Security Center Linux қолданбасы қолданбалық жасақтама өндірушілері шығарған қолданбалық жасақтама жаңартуларын қолданады. Бағдарламалық жасақтаманы жаңарту метадеректері Жаңартуларды Басқару серверінің қоймасына жүктеп алу тапсырмасын орындау нәтижесінде Басқару сервері қоймасына жүктеледі. Бұл тапсырма "Лаборатория Касперского" қолданбалары мен үшінші тарап қолданбалары үшін жаңарту метадеректерін жүктеуге арналған. Бұл тапсырма Kaspersky Security Center Linux қолданбаны жылдам іске қосу шеберінде автоматты түрде жасалады. Жаңартуларды Басқару серверінің қоймасына жүктеп алу тапсырмасын да жасай аласыз.
Осалдықтарды түзетуге арналған бағдарламалық жасақтаманың жаңартулары толық дистрибутивтер немесе патчтар түрінде ұсынылуы мүмкін. Қолданбалардың осалдықтарын түзететін бағдарламалық жасақтама жаңартулары түзетулер деп аталады. Ұсынылған түзетулер – бұл "Лаборатория Касперского" мамандары орнатуға ұсынатын түзетулер. Пайдаланушылық түзетулер – бұл пайдаланушылар орнату үшін қолмен көрсетілетін түзетулер. Пайдаланушылық түзетулерді орнату үшін осы түзетуді қамтитын орнату пакетін жасау керек.
Kaspersky Security Center Linux лицензиясы Осалдықтар мен патчтарды басқару мүмкіндіктерін көздесе, Қажетті жаңартуларды орнату және осалдықтарды түзету тапсырмасын пайдаланыңыз. Бұл тапсырма ұсынылған түзетулерді орнату арқылы бірнеше осалдықтарды автоматты түрде түзетеді. Бұл тапсырма үшін бірнеше осалдықтарды түзету үшін белгілі бір ережелерді қолмен конфигурациялауға болады.
Kaspersky Security Center Linux лицензиясы Осалдықтар мен патчтарды басқару мүмкіндіктерін көздемесе, Осалдықтарды түзету тапсырмасын пайдаланыңыз. Бұл тапсырманың көмегімен Microsoft қолданбалары үшін ұсынылған түзетулерді және үшінші тарап қолданбалары үшін пайдаланушылық түзетулерді орнату арқылы осалдықтарды түзетуге болады.
Қауіпсіздік мақсатында, Осалдықтар мен патчтарды басқару арқылы орнатқан кез келген үшінші тарап қолданбасы жаңартулары "Лаборатория Касперского" технологиялары арқылы зиянды БҚ-дың бар-жоғы тұрғысынан автоматты түрде тексеріледі. Бұл технологиялар файлдарды автоматты түрде тексеру үшін қолданылады және антивирустық тексеруді, статикалық талдауды, динамикалық талдауды, "құмсалғыштың" жүріс-тұрысын талдауды және машиналық оқытуды қамтиды.
"Лаборатория Касперского" мамандары Осалдықтар мен патчтарды басқару арқылы орнатуға болатын үшінші тарап қолданбасы жаңартуларын қолмен талдамайды. Сонымен қатар "Лаборатория Касперского" мамандары мұндай жаңартулардағы осалдықтарды (белгілі немесе белгісіз) немесе құжатталмаған мүмкіндіктерді іздеумен айналыспайды және жоғарыда аталған талдаудың басқа түрлерін жүргізбейді.
Пайдаланушының араласуы үшінші тарап қолданбаларын жаңарту кезінде немесе басқарылатын құрылғыдағы үшінші тарап қолданбаларында осалдықтарды түзету кезінде қажет болуы мүмкін. Мысалы, пайдаланушыдан үшінші тарап қолданбасын жабу сұралуы мүмкін.
Қолданбаның кейбір осалдықтарын түзету үшін қажет болса, қолданбаны орнату лицензиялық келісімін қабылдау қажет. Егер сіз Лицензиялық келісімнен бас тартсаңыз, қолданбаның осалдығы түзетілмейді.